أسماء بتقولي أن في حد كل يوم يرن علينا الجرس ويجرى.. طب وإيه يعني ما أنا عارفه.. أكيد ميشو ابن الجيران هو اللي بيعمل كده وهو كمان اللي بيرمي الزبالة أدام الشقة وهو برضه اللي بيسرق الجزم - أنا شاكك إنه بياكلها- وهو اللي بيكتب على باب شقتي: (شقة عمو الحمار).. بس أعمل إيه معاه؟!..
أولا: هو عنده حصانة لأنه ابن صاحب البيت.. وصاحب البيت ده راجل معلم وماعندوش تفاهم.. ممكن يقتلك عشان متضايق حبتين.. طب ده في إشاعة بتقول إن الربع جنية المخروم الحاج هو اللي خرمه مش الحكومة.
ثانيا: صحيح إن ميشو عنده خمس سنين لكنه مسجل خطر ومش بعيد يكون له ملف في أمن الدولة.
ثالثا: أنا راجل في حالي وعندي طفلة عاوز أربيها.. ده ممكن يخطفها أو يدلق مية نار على وش أسماء أو يعملي كمين هو وصحابه ويثبتوني في الشارع ويجبروني إني أرقص نوم العازب أو أقول: (أنا كلب يا ميشو بيه .. أنا كلب).. زي فيلم احنا بتوع الأتوبيس.. وبعدين أنا أديب محترم وعيب يحصلي كده في الشارع.
الغريب فعلا إني لما قولت لـ أسماء إن اللي بيرن الجرس هو ميشو.. كشت وخافت وصوتها انحشر في زورها وهي بتقول: (ميشو ده ولد ذوق ومؤدب بيعملنا حس ومنظر أكيد صعبان عليه إن مافيش حد بيزورنا فقال يسمعنا صوت الجرس وياخد بحسنا).
عمرو
المشاركات
طب ينفع اسأل انت ساكن فين انت وميشوا باظبط علشان ماعديش من عندكم تانى
ردحذفسامح رضوان
يا ريت تبقا تبعتلي ميشو يرن عليا الجرس لان انا كمان بجد محدش بيزورني و الجرس فاقد النطق و عاوزة اطمن عليه
ردحذفهههههههه هايل ميشو دا تلاقيه مربي كل العماره
ردحذف