جعلونى انبوبة بوتجاز ...

زمان وانا صغيرة كنت هتجنن وابقى كبيرة اقصدى و أبقى مذيعة او حتى عارضة ازياء ولما كبرت و اتخرجت قولت ياريتنى ماكنت حلمت ولا اتمنيت .. يس بعدها بساعتين وخمس دقايق فوقت من الوهم !

وقولت انا لازم اكون اكثر واقعية فى احلامى وقولت انا مش هيأس وهرجع أحلم تانى وساعتها قولت انا نفسى اكون ورقة .... ورقة فلوسكاب اوحتى ورقة كراسة ..وفعلا ظبط حياتى على كده لدرجة انى كنت بعرف الناس عليا بأسم ورقة اللبيدى ....

بس فى يوم وانا قاعدة مع نفسى فى ساعة تجلى أكتشفت.. ان اى قلم رصاص بربع جنيه مخروم يقدر يتحكم فى مصيرى يعنى يشخبط عليا زى ماهو عايز ما أنا ورقة بقه ..ولو مزاجه يكتب فيه على سطر ويسيب سطر محدش يقدر يغلطه .. مش كده وبس دأنا لاقيت ان اى شوية هوا يطرونى .. واى عيل صغير يقدر يلعب عليا اكس اوه ..

وساعتها بس اكتشفت أد أيه انا كنت تافهة وعبيطة... وقررت انى مش هبقى ورقة تانى وقولت انا لازم اغير حلمى وفعلا قعدت مع نفسى مرة تانية..

وقررت ان أنا نفسى ابقى انبوبة بتوجاز أيوه انبوبة بوتجاز واقعدت اقنعنى بالمميزات اللى هتبقى فيا لو بقيت انبوبة وقعدت أقول لى لو بقيتى انبوبة عمرك ما هتوقفى فى طابور البطالة ولا حتى طابور العيش لان السوق ميقدرش يستغنى عن الانابيب وكمان سعرها فى العالى كل يوم...

ده غيرانها مبتتعبشى فى حاجة نازلة متشالة وطالعة متشالة ولو حد فى يوم أتجرأ و زعلها او ضايقها بتنفس غاز وساعتها الدنيا بتتقلب يعنى عمرها ماهيجلها أكتئاب لانها مابتكتمش فى نفسها حاجة وفعلا اقدرت انى اقنعنى بانى لازم اروح اعمل عملية واتحول لانبوبة ..وادينى عملت جمعية ومستنه انى أقبضها واروح اعمل العملية وأقب على وش الدنيا بقى ...

سوما اللبيدى

خنزير لكل مواطن ....

النهاردة كنت قاعدة بتفرج على قناتى المفضلة القناة التالتة على التلفزيون الارضى وى وانا قاعدة نزل عليا الالهام وجالى الحل الاكيد اللى هيخلص مصرنا اللذيذة من انفلونزا الخنازير وبسرعة جريت على موبايلى ودورت على نمرة د/نظيف مالقتهاش فى الموبايل فدورت على نمرة مدام نظيفة برده مالقيتهاش الظاهر إن انا معرفش حد نظيف
خالص ...

طبعا مايأستش وجريت بسرعة على التليفون واتصلت بالدليل وطلبت منهم بكل ذوق وأدب نمرة د/ نظيف او مدام نظيفة بتاعت الاعلانات ورد عليا عمو بتاع السنترال وقال انتى هتقفلى الخط ولا لاء يابنت تيتيت وتيت تيت وياللي اهلك تيتتتتتتت

برده ما يأستش ودخلت جرى لبست هدومى ونزلت من البيت وخدت تاكسى لحد قسم الهرم المهم دخلت القسم وقولت للظابط انا عندى معلومات خطيرة جدااا وعايزة نمرة د/نظيف او مدام نظيفة بتاعة الاعلانات ..فبصلى الضابط نظرة اعجاب وأنبهار وقالى اتفضل اقعدى وقولى لى اللى انت عايزاه وانا هوصله بنفسى للمسؤلين..

وقالى تشربى ايه؟ الحقيقة انا حسيت ان خلاص هوصل صوتى للمسؤلين وهحل المشكلة بتاعت الانفلونزا...فرديت عليه وقولت له ممكن زبادو خوخ لو موجود

ما طولش عليكم شربت بوء من الزبادو وقولت للظابط انا لقيت الحل الوحيد اللى هيخلصنا من انفلونزا الخنازير وهو ان الحكومة تستورد خنازير من الصين وتوزع خنزير على كل مواطن وساعتها لما الخنازير هتعيش معانا فى البيت وهتعرف ظروفنا هيصعب عليها حالنا ومش هترضى تضرنا ابدااااا.... ده كمان احتمال تتفق معانا ضد الاعداء ونشغلها عميل مزدوج زى عادل امام فى دموع فى عيون وقحة وبكده نبقى خلصنا من المشكلة بكل بساطة

ويادوبك هشرب البوء التانى من الزبادوا ولقيت لك ايد خفية امتدت وخدتنى انا والزبادو ورمتنى فى عربية وراحت بينا فى منطقة العباسية ودخلت بينا مبنى زى ما يكون سرايا لونه اصفر وكل الناس اللى جواه لابسين ابيض بصراحة بدأت اقلق ..وقولت مش معقول ان المكان ده يكون اللى فى بالى

لكن ساعت ما لبسونى ابيض زيهم ساعتها بس اتأكدت من اللى فى بالى وعرفت انهم ودونى عند مدام نظيفة علشان اقولها على الحل بتاعى ...وربنا يستر

سوما

النهاردة مضطرة اكلمكم عن ..بسم الله الرحمن الرحيم..ميشو

من حوالى سنتين كنت نايمة فى سابع نومة ساعت ما جرس الباب قعد يرن ...

وعلى غير عادتى قررت انى اصحى من النوم الجميل واقوم افتح الباب ولكنى ما لقيتش حد ..المهم بعد كده أتكرر الموضوع ده كتير اوووووووووى ولكنى فى المرة المليون وخمسمية اتنين وسبعين بدأـت ـ اقلق او اضايق المهم فى شعور دفعنى انى اراقب الجرس من العين السحرية 24 ساعة واقعدت على الحال ده 3 ايام من غير لا اكل ولا شرب ولا نوم
لحد ما زهقت وقررت انام ويادوبك هانام واشد الغطا رن الجرس قمت بسرعة وفتحت الباب و لقيت عيل صغير نازل من الدور الى فوق مسكته من قفاه وقولت له انت اللى بترن الجرس عليا كل يوم رد عليا الوغد وهو هيموت من الرعب وعرقان على الاخر وقالى لاء مش انا..قولت له هتقول وللا تيت تيت.....قالى خلاص انا هعترف بكل حاجة...

(ودار بينا الحوار التاريخى العظيم ده)

سوما : مين اللى بيرن الجرس عليا 24 مرة فى24 ساعة

الطفل الوغد : ميشو ابن الحاج صاحب العمارة هو اللى بيرن الجرس ويجرى ووطى على رجلى زى الافلام وقعد يترجى فيه انى ماجبش سيرته فى الموضوع ادام ميشوا ...
ساعتها انا استغربت اوى ومرضيتش اضيع الفرصة وسالته ليه ...وهددته انى هعمل فيه... تيت وتيت تيت لو ماتكلمش ..

ولقيت الواد بدأ يبص حواليه شمال ويمين وهو بيقول

الطفل الوغد : اصل ميشوا ده مش طفل زينا لاءه ده بسم الله الرحمن الرحيم ..عفريت

سوما : جرا ايه ياابنى انت هتسرح بيا وتشتغلنى ولا ايه

الطفل الوغد : انتى مش بتعرفى ان كل واحد بنى ادم ليه قرين.. اهو ميشو ده قرين ميشو البنى ادم بس هو قتل البنى ادم وقعد مكانه يحكم ويتحكم فينا

سوما: ياسلام بقى انت عايزنى اصدق الكلام ده

الطفل الوغد : طب انتى عارفة ده مرة قال عايزاغير جو واروح الحضانة فراح مدرس من المدرسين فى الفصل غلط و سأله عن الواجب بس عارفة ايه اللى حصل للمدرس ده

سوما : ايه ..

الطفل الوغد : اختفى المدرس هو والاطفال اللى كان بيديهم الدرس من ساعتها لغاية دلوقتى محدش عارف لهم طريق

سوما : يالهوى ..

الطفل الوغد : ميشو ده معندوش يااما ارحمينى .. طب انتى عارفة احنا سمعنا انه عامل اوضة فران فى بيتهم لو امه او ابوه حد فيهم زعله او ضايقه بيحبسه فيها

سوما : طب انت ايه رايك ياحبيبى اعمل معاه ايه ..اشيل الجرس من على الباب ولا انفد بجلدى انا وجوزى وبنتى ونعزل خالص من المنطقة
رد عليا الطفل الوغد وقال: احسن حاجة تعمليها تسبيه يرن الجرس زى ماهو عايز واوعى تحكى لحد على اللى قولته ليكى لحسن انتى عارفة ايه اللى ممكن يحصلك

المهم من ساعتها وانا عايشة فى رعب خصوصا انى كل يوم بسمع حكاية ومغامرة جديدة من مغامرات ميشو هو واصحابه الاشرار لدرجة انى اخر حاجة سمعتها انه داخل فيلم جديد اسمه( ميشو والاشرار السبعة) الموسم الجاى من انتاج السبكى.

سوما

النهاردة 6 اكتوبر.......

النهاردة صحيت من النوم و كالعادة فتحت التلفزيون وقعدت اقلب فى القنوات ....ولكنى استغربت جدااااا لما لقيتهم جايبين على كل القنوات اغانى وافلام وطنية طبعا كنت هتجنن علشان اعرف ايه اللى حصل ...
وبسرعة روحت وصحيت عمرو من النوم وسالته هو ايه اللى حصل فى البلد علشان يجيبوا الحاجات الوطنية ديه...
رد عليا وهو بيتاوب النهارده 6 اكتوبر يا اسماء ورجع نام تانى المهم اقعدت افكر 6 اكتوبر 6اكتوبر مش عيد جوازنا ولا حتى يوم الفلانتين امال فى ايه ايه اللى حصل لكل ده..
روحت صحيت عمرو تانى وقلت له ايه ياعمرو انت ما ما قولتليش ايه حصل فى 6 اكتوبر علشان يعملوا لها احتفال ..رد عليا وهو متغاظ علشان صحيته طبعا محصلهاش حاجة خالص دول بيحتفلو ا كده رخامة وبس
بعدها سبته ينام ...لكن التفكير فى الموضوع ما سبنيش خالص ..وقعدت اقول اشمعنا 6 اكتوبر اللى يعملو لها احتفال ويوم اجازة طب ليه ما بيعملوش لفيصل ولا المهندسين او الزمالك حتى احتفال ده حتى الزمالك ليها لازمة اقلها على اسم نادى كبير واهو يرفعوا من روحهم المعنوية شوية ولا يعنى علشان 6 اكتوبر بقت محافظة طب ما حلوان كمان بقت محافظة اشمعنا بقه ...وبعدين قلت لنفسى بطلى عبط وسذاجة دول طول عمرهم بيعملوا لها احتفال من واحنا صغيرين ده حتى قبل ما تبقى محافظة .......
وساعتها بس افتكرت الايام الصعبة اللى قضيتها ايام المدرسة فى التفكير فى السبب اللى علشانه كانوا بيدونا يوم 6 اكتوبر اجازة حتى ايام الجامعة كنت بقعد ان وزملائى طول الاربع سنين فى كلية التربية قسم التاريخ نفكر ايه السبب ورا اجازة 6 اكتوبر لدرجة ان واحدة زميلتنا قالت لنا ان ليها واحد من اقاربها بيشتغل فى جهاز امنى غير مسئول قالها ان السبب فى اجازة 6 اكتوبر ان فى اليوم ده كوبرى اكتوبر بيعملوا له صيانة علشان كده احنا بناخد اجازة... وكلنا طبعا صدقناها هى وقريبها المسئول رغم اننا لنا كنا بتجمع سوا ونخرج فى اجازة 6 اكتوبر ونتمشى على كوبرى 6 اكتوبر
وعلشان كل ده انا قررت اكتب الموضوع ده يمكن حد من القراء يقدر يرد عليا ويقولى ليه بنحتفل بيوم 6 اكتوبر من انه يوم عادى جداااااااااااااااا